Saturday, June 26, 2010

ايام و حكابات





يا عُمُر شو شفنا ليالي طوال
و سهرات قضّينا بحكي و موال
أحباب شو تركنا بهاك سنين
و مش كل ما منعرف حكي بينقال

Thursday, February 25, 2010

ناس و ناس




ناس كتيري بهالدنيي تمر علينا
منهم ناس بنذكرهم مهما حيينا
و ناس كتيري نفارقها و ما انهمّينا
و ناس إن غابوا شي ليلي تلاقي بكينا
.....
قلوب بيجمعها محبة و صدق و إخلاص
هيدي قلوب مطارحها عا فوق الراس
و ناس اللي قلوبن سودا هاي بدها قواص
شرق و غرب بتترقوص: بيكفّينا
.....
ياللي بعدتوا نسيتونا نحنا مساكين
عم نستنى تودّونا: تقولوا جايين
يمكن هالحق علينا، و مدري من مين؟
نسيتونا، و نحنا: باطل لأ ما نسينا
...

Tuesday, February 16, 2010

النصف التاني


بدي كاسك تعطيني
ومن روس شفافك تسقيني
و سهرتنا الليلة بالجرد
دفّيكي و تدفّيني
.....
مْراحل هالعمر كِنَها ثواني
طفوله و رجال بيصير ختيار
خلّينا من هالأعمار
بكرا بحطك انا بعيوني
.....
فرشْتلِّك فرشة من الورد
و لحاف يدفي من البرد
ما بدها أخد و لا رد
و تقوليلي وحياتي
.....
خلينا واحد ب تنين
بهالدنيي يا نور العين
ماحلى جَمعِة هالقلبين
و بقلبي رح بتباتي
.....
شفتك حلم بليلة صيف
و سهرتكن عا كيف الكيف
و قالولي أهلاً بالضيف
و كلُّن حِلْفوا بحياتي
.....
الواحد فينا بيخلق نصّ
يدور عالنصّ التاني
و اللي بياكل وحدو يغصّ
و عا نفسو هوي الجاني

Monday, February 8, 2010

!!ورده للــ قمر تــا يطل علينــا


شفت الوردة بالبستانِ
و قلتلاّ شو هالريحة؟
قالتلي: كِنّك عِشقاني؟
قلتلا: بلاها فضيحة
.....
قالت هيدا هوّي الحب
ما بيعرف غير الالب
و عا وجّو رح يوقع طبّ
ياللي يعاند بِ حبو
.....
أنا وردة كل العشاق
و أحلى هديي للمشتاق
بيتراضوا من بعد فراق
لمّا يْحِطّا بِ عبّو
.....
جربي تاخديني لَيْها
و شوفي الفرحة بعينيها
راح بتقلّك شو عليها؟
لو كاس الحب نْصِبّو
.....
عمر الورد زغير كتير
لكن مفعولو شو كبير
ما يهمّو كبير و لا زغير
كِلْ مِنْ حِبّو بِ قلبو


Wednesday, February 3, 2010

القمر غــــاب






لو يعرف إني فقدتلو
ما كان يغيب
لو بعرف إني بحنلو
ما تركتو يغيب
.....
لو بعرف إنو هالدمعة
رح تشكيلي عا غيابو
لو بعرف بتطول الرجعة
و قفتلو على بابو
....
لو يعرف إني بتذكَّر
لو يعرف قلبي
يتسكَّر
لو يعرف شو طعم السكر
عا غيابو مر كتير
.....
عم شوف خيالو حواليي
عم شوفو بدمعة عينيي
عم بصبر لكن ما فيي
و غيابو طال كتير
.....
بدي يرجع متل الأول
ما يقلّي هالماضي تحوّل
ما بين اليوم و عِمْنوّل (السنة اللي فاتت)
نحنا اتغيرنا كتير


Tuesday, January 5, 2010

وقالت ...كلكن عن جد متل بعض



يا إمي شو دقَّينا بواب الحلوين ... لا قاموا طلوا علينا و لا قالوا مين


بيلبقلن والله يكونو شو مغرورين ... الناس بتركض وراهن عا طول سنين


:


سمرا ان كانت زينتها عيونا الوساع ... نظرة زغيري بتسوسح قلب الملتاع


حضن الدافي بيريَّح كل الأوجاع ... وخفة دمَّا تنسِّينا الناس التانيين


;


حلوي ان كانت عم تضوي بِي عتم الليل ... بتدحرج قلب العاشق من مَيل لمَيل


غاليه وباعمالها توريني الويل ... وخِيّالا بدو يلحَّق قبل الباقيين


;


و تقبر قلبي هالحلوة هالحنونة ... تدخل جوات القلب بكل فنونا


من حبا نص العالم شو مجنونة ... الله يديما شو بتِجبُر هالمحرومين


:


وهلق شو بدنا نحكي عالدلوعة ... لما تقرب منا بتقلَّك أوعى


بدا مين اللي يكون بأمر طوعا ... ويمكن ياخد شي بوسة كل ست سنين


:


وهيدي البنت اللي آخدتا جد بجد ... بتعرف شو بتعمل تا توضع مية حد


حكياتا تطلع تنزل بين صد ورد ... و ما عندا واحده أحسن من التانيين


;


كيف ما كانت هالحلوي بنحبا كتير ... خِصَّا ان كانت ملفوفة وتعطينا شي تفكير


كرمال تضل براحة نبقى بتعتير ... وكل الناس حواليها شو جهلانين


;